Mga iskul sa mga liblib na lugar na walang kuryente, klasrum etc., pansinin naman!

KUYA WIN GATCHALIAN / WIN TAYONG LAHAT

SA abot ng makakaya, pinagsisikapan ng ating gobyerno na maibahagi ang mataas na ka­lidad at abot-kamay na edukasyon para sa lahat, kabilang dito ang mga estudyanteng naninirahan at nag-aaral sa mga liblib na lugar sa buong bansa.

Ang Last Mile Schools Program ng De­partment of Education (DepEd) ay isa lamang sa kanilang mga inisyatibo na naglalayong pa­ngalagaan ang mga mag-aaral na nasa Geogra­phically Isolated, Disadvantaged and Conflict-Affected (GIDCA) na lugar at siguraduhing na­bibigyan sila ng patas at parehong access sa de-ka­lidad na edukasyon tulad din ng ibang mag-aaral.

Ating ikinatutuwa ang nasabing proyekto ng DepEd na pinamumunuan ni Secretary Leonor Magtolis Briones dahil sa pamamagitan nito, nabibigyan ng prayoridad ang pagsagip sa mga paaralang noon ay hindi gaanong na­pagtutuunan ng pansin at nahuhuli na sa pag-angat ng mga paaralang nasa lungsod.

Bilang chairman ng Senate Committee on Basic Education, Arts, and Culture, nagkaroon ang inyong lingkod ng pagpupulong kasama si Sec. Briones upang pag-usapan ang kasalu­kuyang estado ng basic education sa bansa at ang mga dapat pang gawin at pagbutihin dito.

Ayon sa DepEd Memorandum No. 059, s. 2019 na “Prioritizing the Development of the Last Mile Schools in 2020-2021: Reaching Out and Closing the Gap,” ang Last Mile Schools ay may apat na classrooms at mas mababa sa lima ang mga guro.

Bukod dito, wala itong kuryente, hindi ma­ayos ang lugar at wala ring pondong pampa­gawa ng mga sirang pasilidad, maging ng mga bagong proyekto.

Wala rin itong mga pangunahing kagamitan, computer, internet connection, kakaunti lang ang bilang ng mga libro at walang kasangka­pang panglaboratoryo.

Ang populasyon ng mga estudyante ay hin­di lalampas sa 100 kung saan higit 75 porsiyento nito ay indigenous people (IP). Higit sa lahat, ang biyahe mula sa bayan patungo sa paaralan ay mahigit sa isang oras kaya pahirapan ang pagpunta rito.

Dahil sa ganitong sitwasyon, kakailanganin nating magkaroon ng malawakang suporta. Isa sa mga nakikita nating solusyon ay maging bahagi ang Last Mile Schools sa infrastructure program na Build, Build, Build ng pamahalaan.

Kaya naman, tinatawagan natin ang Natio­nal Economic Development Authority (NEDA) at Department of Public Works and Highways (DPWH) na makipagtulungan upang maisaka­tuparan ang proyektong ito.

Ayon sa DepEd, tinatayang P92 bilyon ang kakailanganin upang mapondohan ang kons­truksiyon, pagsasaayos at pagpapaganda ng 8,000 Last Miles Schools sa susunod na tatlong taon. Ngunit, nakikita nating kulang at maliit ito kung ikukumpara sa orihinal na P8.4 trilyong halaga ng Build, Build, Build Program sa anim na taong panunungkulan ng kasalukuyang ad­mi­­nistrasyon.

Sa determinasyon ng DepEd na gawing prayoridad ang Last Miles Schools Program at ngayon sa kanilang pakikipag-ugnayan sa DPWH upang magbukas ng mga access road para sa kaginhawahan ng mga mag-aaral, wala tayong nakikitang dahilan upang hindi maging parte ang nasabing programa sa Build, Build, Build.

Kaya anuman ang mangyari, tayo sa Senado ay patuloy na isusulong na makapagpatupad ng kaakibat na batas at polisiya para sa pagsa­sakatuparan ng layuning magkaroon ng deka­lidad na edukasyon ang mga kabataang mag-aaral na nasa probinsiya.

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City o mag-email sa surewin.bulgar@gmail.com