6 kulong sa P1.3 milyong shabu

HALOS nasa P1.3 mil­yong halaga ng shabu ang nakumpiska ng mga awto­ridad sa anim na naaresto sa magkahiwalay na buy-bust operation sa Caloocan City.

Alas-5:00 ng hapon nang isagawa ng mga awto­ri­dad ang unang operasyon sa isang bahay sa Bgy. 33, May­pajo, na nagresulta sa pagkakaaresto kina Kevin Gacer, 20, at Rica Mariano, 31.

Dinamba ang mga sus­pek matapos iabot sa pulis na nagpanggap na poseur-buyer ang sachet ng shabu kapalit ng P1,000 marked money at nakumpiska sa mga ito ang dalawang sachets ng shabu, buy-bust money at 98 gramo ng shabu na nakalagay sa plastic ng yelo na nasa P667,000 ang halaga.

Alas-6:30 naman ng gabi nang isagawa ang ika­lawang operasyon sa Bgy. 12 kung saan nadakip ang mga target ng operasyon na sina Mylene Torres alyas Biday, 43, at Jerry Campo­sano, 45, matapos bentahan ng isang sachet ng shabu ang pulis na nagpanggap na buyer kapalit ng P1,000 marked money.

Narekober kay Biday ang buy-bust money at ang ibibentang shabu sa pulis habang nakumpiska kay Jervy ang isang plastic ng shabu.

Timbog din sa operas­yon sina Jinalyn Vio­gela, 27, at Marvin Vergel, 26, kung saan nakumpiska sa mga ito ang nasa 92 gra­mo ng shabu na nasa P 625,600 ang halaga.