MAY MAGBABALIK SA POSISYON NG SEC-GEN O MAY TITIGBAKIN?

MAAARI muling maibalik sa kanyang posisyon bilang secretary-general ng Philippine Olympic Committee (POC) si Association of Boxing Alliances in the Philippines (ABAP) vice president Patrick Gregorio matapos itong pansamantalang mawala sa posisyon dahil sa kaguluhan sa Olympic body.

Ito ang isa sa mga unang nais gawin ni POC president Abraham “Bambol” Tolentino matapos makuha ang posisyon nang maungusan si Philippine Athletics Track and Field Association (PATAFA) chief Philip Ella Juico sa ginanap na eleksyon noong Linggo sa Century Park Hotel.

Iniutos ni Tolentino na alisin sa kani-kanilang puwesto sina Richard Bachmann ng soft tennis bilang membership committee head at Atty. Charlie Ho bilang secretary-general.

Inamin mismo ng 51-anyos na si Gregorio sa BULGAR na hihintayin niya muna ang ratipikasyon ng 1st POC executive board ngayong Biyernes, Agosto 2, bago siya magkomento hinggil sa pagpapabalik sa kanya sa puwesto.

Ngunit, sinabi ng dating executive ng Samahan ng Basketbol ng Pilipinas (SBP) na handa itong ibigay ang kanyang serbisyo o tulong ng pamunuan ng Olympic Body.

“Isang karangalan,” pahayag ni Gregorio nang hingan ng reaksiyon sa napipintong pagbabalik niya sa dating posisyon. “I am willing to help the new POC President, Cong. Bambol Tolentino,” dagdag ng dating chairman ng Philippine Basketball Association (PBA).

Matatandaang pinalitan si Gregorio matapos ang sigalot sa POC na naging dahilan upang mag-resign si dating POC president Ricky Vargas at tumayong pansamantalang head si Joey Romasanta. Pinaupo si dating POC arbitration committee member Ho bilang kapalit ni Gregorio.