May sakit sa isip, masakit din ang bulsa sa sobrang mahal ng gamot!
HINDI biro ang pagkakaroon ng mental health condition, kaya nararapat lang na isa ito sa mga dapat bigyang-prayoridad ng pamahalaan ngayon.
Gayunman, ang sakit sa pag-iisip ay pangatlo sa nangungunang sakit ng mga Pilipino, kaya inihahain ang panukalang may layong bawasan ang presyo ng mga gamot para sa mga indibidwal na nakararanas ng ganitong kondisyon.
Matatandaang, ang Philippine Mental Health Act RA 11036 ay may rules and regulations kung saan maaaring makakuha ng persons with disabilities (PWDs) I.D. ang mga taong may mental health issue tulad ng bipolar disorder, post-traumatic stress disorder at schizophrenia.
Gayundin, may 20% discount ang pagbili ng gamot kapag may PWD I.D. at malilibre ang value added tax (VAT) sa karamihan ng mga serbisyo.
‘Yun nga lang, kulang pa rin umano ito dahil sobrang mahal ng presyo ng mga anti-depressant na gamot na 10 porsiyento agad ang kabawasan sa minimum wage sa bansa.
Samantala, ang pagkakaroon ng depresyon ay walang pinipiling antas, pero paano kung ang indibidwal na mayroon nito ay walang kakayahang makabili ng gamot na magreresulta para lalo pang lumala ang kanyang kondisyon?
Kaya ang panawagan natin, konsiderasyon para sa mga pasyenteng nakararanas ng mental health condition, iparamdam!
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments