TNT KATROPA, NAMUMURO NA BA SA FINALS?

NAMUMURO na ang TNT KaTropa sa pagsampa sa finals matapos nilang kalusin ang Barangay Ginebra Gin Kings, 88-71 sa Game 2 ng PBA Commissioner’s Cup semifinals sa Araneta Coliseum. Isang hakbang na lang ang KaTropa sa championship round, hawak nila ang 2-0 bentahe sa kanilang best-of-five series. Kumayod si import Terrence Jones ng triple-double na 15 points, 19 rebounds at 10 assists para sa TNT. Maagang nagparamdam ng lakas ang KaTropa, hinawakan nila ang nine-point lead, 51-42 sa halftime. Hindi nagpabaya ang TNT sa third canto kaya nanatili sa kanila ang bentahe, 68-55 papasok ng fourth. Samantala, kahit natalo, naniniwala pa rin ang Rain or Shine Elasto Painters na kaya nilang bumangon upang manatili ang kanilang tsansa sa asam na lumaro sa championship round.

Muntik makuha ng Elasto Painters ang panalo sa San Miguel Beer sa Game 1 ng kanilang best-of-five semifinals, pero kinapos sa endgame. “It’s just turnovers. ‘Yung sa dulo kasi, I don’t want to say inexperience, but I think, we just made mistakes that a normal player will do,” saad ni ROS coach Caloy Garcia. Tangan ng Beermen ang 1-0 serye matapos ang 111-105 panalo nila noong Sabado sa Big Dome, inakbayan sila ng kanilang import na si Chris McCullough na nagtala ng 32 points, 14 rebounds at limang assists. Aminado si SMB mentor Leo Austria na muntik na silang matalo sa laban dahil sa tindi ng depensa ng Elasto Painters. “They were able to neutralize June Mar (Fajardo) at the post by running a lot of ball screens on top, forcing me to get June Mar out of the floor. But luckily, I have big men like Christian who played really well, especially on defense. His hustle was a big factor that won this for us. But, overall it’s a team effort,” saad ni Austria. Sinabi pa ni Austria na mabagal ang kanilang simula kaya nabigyan ng kompiyansa ang kanilang katunggali. Inaasahang huhugot ng lakas si Garcia sa malulupit niyang locals na sina Beau Belga, Rey Nambatac, Gabe Norwood, rookie Javee Mocon at two-time Most Valuable Player, (MVP) James Yap. (ATD)