Imbes na pahirapan; Angkas riders, tulungan!
SA matinding trapik na nararanasan natin, to the rescue ang Motorcycle Hailing App na Angkas sa pagiging convenient nito para sa lahat.
Gayunman, lahat ng motorista ay may kani-kanyang diskarte sa pagda-drive kung anong ruta ang kanilang daraanan.
‘Yun nga lang, maaari itong maapektuhan dahil sa bagong panuntunan na ipinatutupad laban sa mga rider ng Angkas kung saan ipinagbabawal sa kanila ang makadaan sa Osmeña Highway dahil umano sa mababang klase ng makina ng kanilang mga motorsiklo.
Kaya hindi napigilan ng mga rider na umalma at kuwestiyunin ito.
Una nilang kinuwestiyon ang kapangyarihan ng ahensiyang nagpapatupad ng ban at buwelta nila, hindi pribado ang kalsada para magkaroon ng limitasyon para sa kanila.
Gayundin, wala pang inilalabas na kautusan ang mga ahensiya ng pamahalaan tulad ng DOTr, Toll Regulatory Board o DPWH tungkol sa naturang pagbabawal.
Samantala, kung tuluyang maipatutupad ang nasabing ban, mainam kung bibigyan sila ng alternatibong daraanan nang sa gayun ay hindi sila mahirapan.
Dagdag pa rito, pinagagaan na nila para sa mamamayan ang transportasyon, tapos ang isusukli pa sa kanila, pahirap imbes na tulong. Tsk!
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments