Bahay ginawang drug den | Tatay, 3 anak kulong sa droga

ISANG ama at tatlo nitong anak na lalaki na si­nasabing sangkot sa iligal na droga ang arestado sa buy-bust operation ng Makati City Police Station Drug Enforcement Unit, Special Weapons and Tactic at Spe­cial Reaction Unit sa Bgy. Cembo, Makati City.

Kinilala ni Makati City Police Chief P/Colonel Ro­gelio Simon, ang mga nahuli na sina Gomerciano Cama­rador, 60; mga anak na sina Homer, 38; Gomer­ciano, Jr., 30, at Jomar, 29.

Ayon kay P/Lieutenant Jeson Vigilla, alas-7:35 ng gabi nang isinagawa ang operation sa bahay ng mag-aama na nagsisilbing drug den.

Nakuha sa mag-aama ang 60 sachets na naglalaman ng hinihinalang droga na may street value na P30,000, walong bala ng 9mm, apat na bala ng kalibre .38, da­lawang bala ng kalibre .22, drug paraphernalias at ang P300 buy-bust money.

Ani P/Lt. Vigilla, nahuli ang mag-aama matapos magpanggap na poseur-buyer ang isa sa kanyang mga tauhan para bumili ng nasabing droga.

Matagal na umanong inirereklamo ng ilang resi­dente ang mag-aama dahil iba’t ibang tao ang dumarayo sa bahay ng mga suspek para bumili ng ipinagbabawal na droga.

Katwiran naman ng ma­tandang Camarador, hindi niya alam ang ginagawa ng mga anak sa ganitong iligal na gawain.

Ayon naman sa tatlong anak, hindi sila nagtutulak ng droga.