Kaya nakipagkita sa ama ng Maynila… ALDEN, MAY INIHIHIRIT KAY MAYOR ISKO

Erlinda Rapadas / TEKA NGA

MARAMING nagulat at nagtaka nang lumabas sa social media ang larawan nina Manila Mayor Isko Moreno at Alden Richards na magkasama. Agad na inisip ng lahat na baka may special project si Mayor Isko na ipahahawak sa Pambansang Bae o baka may movie silang pagsasamahan.

Pero, nabigyang linaw ang lahat ng espekulasyon nang maibalita na mismo sa news program ng GMA-7 na ang pagbisita ni Alden sa opisina ni Mayor Isko kasama sina Mikee Quintos, Jo Berry at Betong Sumaya ay para humingi ng permiso na gamitin ang ilang lugar sa Maynila na maging location ng bagong serye ng Pambansang Bae. Buong-puso naman itong sinuportahan ng batambatang mayor ng Maynila.

Well, balita namin, sa bagong serye ni Alden ay may taglay siyang kakaibang powers.

Samantala, masaya at abut-abot ang pasasalamat ni Alden dahil ang pelikula nila ni Kathryn Bernardo na Hello, Love, Goodbye ay Graded A ng Cinema Evaluation Board.