GALEDO, PETMALU SA PEDALAN!

NANATILING malakas si Mark John Lexer Galedo sa trono ng Men’s Elite, habang si Nichol Pareja ay nagpakitang-gilas sa Men’s Under-23 at ang mga kababaihan sa Standard Insurance ay nangwalis sa Women’s category ng individual time trial (ITT) races ng PhilCycling 2019 National Road Cycling Championships noong Martes sa Tagaytay City.

Naorasan si Galedo, 33, ng 27 minutes at 26.12 segundo para maghari sa 18-km Men Elite ITT na nagsimula sa Sandari Batulao sa Nasugbu, Batangas at nagtapos sa Praying Hands Monument sa Tagaytay City sa karera ng Standard Insurance, MVP Sports Foundation at Tagaytay City.

Naka-silver si Go-For-Gold’s Jonel Carcueva sa tinapos na 9.75 secs. sa likod ni 7-Eleven Cliqq Air21 Roadbike Philippines rider Galedo, habang si Marcelo Felipe (28.43 behind), ang national champion’s teammate ang naka-bronze. Nanggulat si Nichol Pareja, 19, ng 7-Eleven sa kanyang gold medal-winning time na 26:57.60 sa Men’s Under-23, kasunod nina Ismael Gorospe Jr. (GFG, 28:24.20) at Daniel Ven Cariño (GFG, 28:28.30).

Ginawaran ng medalya at cash prize nina Ube Media Inc./Le Tour de Filipinas head Donna Lina at Go-For-Gold head Jeremy Go ang mga nagwagi. Pero, ang araw na iyon ay para sa Philippine Navy-Standard Insurance women’s team na nagpakita ng husay sa karera na magsisilbing dry run para sa nalalapit na 30th Southeast Asian Games sa Nob. 30 hanggang Dis. 11.

Nanguna si Kate Yasmin Velasco sa U-23 category, nagreyna si Maritoni Krogg sa Women’s junior race habang si Jermyn Prado ang pinakamabilis sa Women’s Elite. Sinabitan ni S-Insurance team owner Ernesto “Judes” Echauz ang riders ng tatlong gold medals sa kanilang kampeonato.

Naorasan si Velasco ng 21:33.10 sa 12-km ITT, 2nd si Mhay Ann Linda (22:20.60) para sa silver at Shagne Paola Yaoyao (22:59.70) sa bronze, habang si Krogg ay naorasan ng 20:14.19 para sa gold at top women Nicole Quiñones (22:03.40) at Marlen Marasigan (22:29.00).

Nagpakitang-gilas din si Velasco sa oras na 19:24.50, nanaig kay 2015 SEA Games ITT champion Marella Salamat (19:39.00) at Avegail Rombaon (20:56.40) sa karerang inalalayan din ng Highway Patrol Group ng PNP Region 4A command na pawang mga eksperto sa paghawak ng road cycling races. (MC)