PACMAN, SUSUNOD NA KUKULITIN SI M’WEATHER?

BUKAS pa rin umano sa posibilidad na kaharapin ni bagong hirang na World Boxing Association (WBA) welterweight champion Manny “Pacman” Pacquiao si undefeated ‘retired’ fighter Floyd “Money” Mayweather, Jr. sakaling magdesisyon itong muling labanan ang pambansang kamao para sa kanilang ikalawang pagtutuos.

Naging matagumpay ang eight-division world champ na makuha ang titulo laban kay Keith “One Time” Thurman (29-1, 22KOs) mula sa isang ‘split decision’ noong Sabado ng gabi (Linggo ng umaga sa Pilipinas) sa MGM Grand Garden Arena sa Las, Vegas, Nevada. “If he’s willing to come back and willing to fight me, then at the time he will announce it, and we can say yes,” wika ni Pacquiao sa isang website, nang matanong ito hinggil sa posibilidad na labanan ulit si Mayweather (50-0, 27KOs).

Marahil ay ito pa rin ang isa sa mga inaabangan ng boxing fans sa buong mundo, ngunit, batid ni Pacquiao (62-7-2, 39KOs) na mahirap pa malaman sa ngayon ang magiging resulta kung matutuloy ang ikalawang “Battle for Greatness.” “I don’t have an idea, my plan this time is one fight at a time,” wika ng fighting Senator. “He’s in retirement and he’s enjoying his retirement; he’s inactive,” dagdag nito.

Matatandaang ito rin ang hiling ni Hall of Famer coach Freddie Roach noong nakaraang Linggo na makabawi kay Mayweather ngunit, aminado rin ito na malabo pa sa ngayon ang naturang sagupaan. “I can’t see it. Floyd’s retired and his people say there is no interest. But there will be other options,” wika ni Roach. Personal na nanood si Mayweather sa bakbakan ng pambansang kamao at ni Thurman sa ring side, nang mahingan ito ng reaksyon sa naging laban ng dalawa. “That doesn’t surprise me. That’s Manny Pacquiao.” pahayag umano ni Mayweather ayon sa The Athletics.

Ngunit, kung hindi man daw matuloy ang laban ng Pambansang Kamao kay Mayweather ay hindi sila aatras kung sakaling may ibang ihaharap dito. “If Mayweather doesn’t come to the table after this fight, if he’s too scared, then we have (Terence) Crawford. There’s a lot of good names out there, Errol Spence, Jr. and so forth. We want to be in the fight game. But we don’t want to just be in the fight game, we want to be the best in the fight game,” dagdag nito.

Si Terence Allan “Bud” Crawford (35-0, 26KOs) ay kasalukuyang World Boxing Organization (WBO) welterweight champ habang si Errol “The Truth” Spence Jr. (25-0, 21KOs) ang may hawak ng International Boxing Federation title.

Lalabanan pa ni Spence Jr. si World Boxing Council (WBC) welterweight champ Shawn Porter para sa kanilang ‘unification bout’ sa Set. 28 ngayong taon, habang nag-aabang pa si Yordenis Ugas (24-4, 11KOs) na nagwagi sa undercard match ng Pacquiao-Thurman laban kay Omar Figueroa (28-1-1, 19KOs), na siyang ‘mandatory’ challenger nina Spence at Porter.