Sa loob ng isang linggo | 5,000 NADALE NG DENGUE

MAHIGIT 5 libong kaso ng dengue ang naitala ng De­partment of Health (DOH) sa loob lamang ng isang linggo.

Ayon sa DOH, mula Hunyo 30 hanggang Hulyo 6, nasa 5,744 dengue cases na ang naitala sa buong ban­sa.

Mas mataas ito ng 22% kumpara sa 4,703 kaso na naitala sa kahalintulad ng petsa noong nakaraang taon.

Dahil dito, umakyat na sa 115,986 ang den­gue cases na naitala ng DOH mula Enero 1 hanggang Hulyo 6.

Karamihan umano sa mga kaso ng sakit ay mula sa Region 6 na umabot na sa 5,826 kaso; sumunod ang Region 4A na may 12,780 kaso; Region 12 na may 9,572 kaso; Region 10 na umabot sa 9,354 kaso at Region 7 na may 9,259 cases.

Bumaba naman ang kaso ng sakit na naitala sa National Capital Region (NCR) na mula sa dating 8,603 noong 2018 ay naging 7,768 na la­mang ngayong 2019.

Pinakaapektado umano ng sakit ay ang nasa 5-9 years age group na 23% ng ka­bu­uang kaso, sumunod ang 10-14 years age group na nasa 19% naman.

Karamihan sa mga nabi­biktima ay mga lalaki o 52% ng kabuuang kaso habang 48% naman ang mga babae.

Muli namang nagpaalala ang DOH sa publiko na mag-ingat para makaiwas sa dengue.