TAGUMPAY NG PHL JUNIORS JUDO, APAT NA MEDALYA SA HONG KONG

NAG-UWI ng apat na medalya ang koponan ng Philippine Juniors Judo sa prestihiyosong Hong Kong Asian Juniors and Cadets Judo Cup na ginanap noong Hulyo 13-14 sa Tin Shui Sports Centre, Hong Kong.

Dalawang medalya ang naiuwi ni UST junior High School Ann Felice Barbuco matapos niyang kunin ang pilak sa Junior’s Division at ang tanso sa Cadets’ Division.

Dinaig si Barbuco ni Tseng Chih-Jou ng Chinese Taipei para sa championship ng Juniors Half-Heavyweight division (-78kgs), habang siniguro ang tansong medalya sa Cadets heavyweight division (+70kgs) nang talunin si Ashley Lim ng Singapore. Napunta ang gold medal sa Cadets kay Sydnee Andrews ng New Zealand at silver medal kay Hikari Otaka ng Japan.

Kinapos si John Carlos Aniciete sa championship ng Cadets middleweight (90kgs) division nang talunin siya ni Changsu Han ng South Korea sa (-90kgs) para makuha lang ang silver medal.

Ibinulsa ni Chino Sy ang isa pang tansong medalya para sa bansa sa half-middleweight (-81kgs) category ng junior’s division nang talunin si Kim Do U ng South Korea. “This is a great experience for our student-athletes lalo na ‘yung pagkapanalo nila against top caliber athletes. This is a welcome development for their preparation in the upcoming UAAP,” pahayag ni Philippine team Juniors And Cadets Head Coach Paul Michael De Vera.

Sila ay pawang mga student-athlete ng University of Santo Tomas na naghahanda sa pagsabak sa 82nd season ng University Athletic Association of the Philippines (UAAP) Judo Championships.