Ginang ninakawan na sinaksak pa sa leeg, kritikal

ISANG ginang ang ginagamot matapos saksakin sa leeg at pagnakawan sa Bgy. Mayamot, Antipolo City, Rizal.

Kinilala ang biktimang si Edcel Arios, habang ang suspek ay si Aries Corta.

Pasado alas-10:00 ng gabi, abala sa panonood sa kanyang cellphone ang biktima nang mapansin nitong may tila nagbubukas ng bintana.

Pagtayo nito upang puntahan ang naturang kaluskos, bumulaga ang suspek. Pinadapa siya nito saka sinaksak sa leeg kung saan pinilit pa nitong manlaban.

Ilang saksak pa sa iba’t ibang bahagi ng katawan ang kanyang tinamo bago nakatakbo palabas at nakahingi ng tulong. Agad siyang nadala sa ospital habang naaresto naman ang suspek sa tulong ng mga barangay official at nagpapatrulyang mga pulis.