2 pekeng seaman, huli sa NAIA

DALAWANG pasahero na nagkunwaring seafarers ang nasabat ng Bureau of Immigration (BI) sa Ninoy Aquino International Airport (NAIA).

Ayon kay Bureau of Immigration-Port Operations Division Chief Grifton Medina, nadiskubre nila ang bagong scheme ng human traffickers nang magpakita ang dalawang pasahero ng pekeng Overseas Employment Certificates (OEC), Seaman’s Book at letters of guarantee mula sa umano’y shipping agent nila.

Ang dalawa na kapwa Filipino ay nakatakdang sumakay ng Cathay Pacific Air flight noong July 2 patungong Hong Kong na ang pinal na destinasyon ay sa Dubai, United Arab Emirates nang sila ay maharang.

“During questioning, both of them admitted that they paid their handler P5,000 each for the bogus documents that they presented,” ani Medina.

Aniya, lahat ng umaalis na OFWs kabilang na ang mga seaman ay masusing ini-screen sa paliparan bago ito pinahihintulutang makaalis ng bansa upang makasiguro na hindi sila magiging biktima ng illegal recruiters.

Dagdag pa ng opisyal, madali nang madiskubre kung peke o hindi rehistrado ang OEC dahil integrated na ang system ng POEA at BI.

Ang dalawang pasahero na hindi muna pinangalanan ay kasalukuyang nasa pangangalaga ng Inter-Agency Council Against Trafficking.