‘KAHINAAN AT INJURY’ NI THURMAN SASAMANTALAHIN NI PACMAN
- Gerard Peter Ace
- Jul 11, 2019
- 2 min read
KUMPIYANSA si Head Coach Freddie Roach na dodominahin ni eight-division world champion Manny “Pacman” Pacquiao ang kanyang laban kay World Boxing Association (WBA) welterweight champ Keith “One Time” Thurman sa paghaharap nila sa July 21 sa MGM Grand sa Las Vegas, Nevada.
Susubukang gibain ng Pambansang Kamao ang malinis na record ng 30-anyos na American champion na 29-0 winning slate na may maangas ding 22 knockouts laban sa hawak na 61 wins, 7 losses, 2 draws at 39 knockouts ng 40-anyos na Senador. Ngunit, sa kabilang banda, nakikinita ng premyadong tactician na mahihirapan ang Kano na sabayan ang bilis at liksi ng mga galaw at suntok ng Pinoy champion.
“His speed factor will be the controlling part. Everyone says they get ready for fast fighters, but once they get in there with Manny Pacquiao, the speed will take over. That will overwhelm our opponent and that’ll be the beginning of the end,” bulalas ng 59-years-old na trainer sa interview nito sa Boxingscene.com.
Bukod sa angking kalamangan ni Pacquiao sa bilis at galaw, ilan pa sa tinitingnang bentahe ng kampo ni Roach ay ang malaking pagbabago sa laro ni Thurman sa mga nakalipas na laban nito. Napansin niyang tila nawala ang dating lakas nito at mukhang may dinadalang injury na hindi pa gumagaling.
“If you look at his last few fights, he’s really faded in each one of them. And I do feel like he possibly has an injury that has not healed,” wika ng trainer. Patuloy pa ring nanaig si Thurman sa mga nakaraang laban kontra kina 34-anyos Josesito Lopez (36-7, 19 KO’s) noong Enero 26, 2019 sa Barclays Center sa Brooklyn, New York at Danny Garcia (34-2, 20 KO’s) noong Marso 4, 2017.
Ngunit, sa parehong laban na ito ay hindi nailabas ni Thurman ang pamatay na suntok matapos magwagi via Majority Decision kay Lopez at Split Decision kay Garcia.
Sinegundahan ni Pacquiao ang pahayag ng kanyang batikang coach hinggil sa bentahe nito kay Thurman at nagbabalang may sorpresa ito sa laban. “I will not really know until I am in the ring with him, but I believe I have the better speed and footwork. I certainly have better experience against better opponents,” ani Pacquiao.
Comments