Pulis, na-video na nagmumura at nagbabanta, sibak

SIBAK sa puwesto ang isang pulis ng San Juan City, na makikita sa isang viral video na kinukompronta ang isang lalaki sa loob ng ka­rinderya matapos na uma­no’y sapawan siya ha­bang bu­mibili ng pagkain, kama­kalawa ng gabi.

Ayon kay NCRPO Director P/MGen. Guilllermo Eleazar, sinibak niya sa puwesto si P/SMS Arnulfo Ardales, na nakata­laga sa Police Com­munity Precinct 3 ng San Juan City Po­lice dahil sa misconduct.

Pansamantala muna ani­yang ililipat si Ar­dales sa District Headquarters Sup­port Unit (DHSU) ng Eas­tern Police District (EPD) ha­bang nagsasagawa pa ng imbestigasyon ang mga aw­toridad hinggil sa insidente.

Una rito, kumalat ang video kung saan ma­kikita si Ardales na kinu­kompronta ang com­plainant na si Aaron Estrada, 21, sa loob ng ka­rin­derya sa Aurora Boule­vard, alas-11:00 ng gabi ni­tong Sabado.

Sa viral video ay tila na­bastusan si Ardales nang ha­bang bumibili siya ay puma­sok si Estrada at dumuk­wang sa tindahan upang bu­mili rin sana.

Agad na sinita at pinag­salitaan ng pulis ang biktima nang aniya ay ‘sapawan’ siya nito. Pinagmumura, dinuro at pinagbantaan pa ng suspek na aarestuhin at mamarka­han ang complainant.

Sa huli ay hindi na bumili ang pulis at galit na umalis nang mag-sorry ang biktima.

Lingid sa kaalaman ng pulis ay may nakakuha pala ng video ng kanyang ginawa at nang mag-viral ito na nakaabot sa kaalaman ni Gen. Eleazar.