Condo na drug den ni-raid | BEYBI, PANG-COLLATERAL SA DROGA, BUKING

ANIM katao na mga hinihinalang drug pusher at user ang arestado sa isang condominium unit na nag­mistula umanong drug den sa ginawang buy-bust ope­ration ng Philippine Drug Enforcement Agency-Spe­cial Enforcement Unit sa Mandaluyong City, kahapon ng madaling-araw.

Kabilang naman sa na­sagip sa operasyon ang li­mang buwang sanggol na hi­nihinalang ginamit umano ng mga suspek bilang pantubos sa mga magulang.

Kabilang sa naaresto si Dustin Catolico, isang engi­neer na pangunahing target ng operasyon at isang bu­wang minanmanan ng PDEA.

Nakuha sa operasyon ang ilang pakete ng hinihi­nalang shabu na nasa mahi­git 100 gramo na nagkakaha­lagang mahigit P700,000, drug paraphernalias at wa­long bala.

Ayon sa PDEA, posib­leng biktima ng kidnapping ang sanggol nang umamin ang mga suspek na hindi nila anak ang bata. Posible ring ginagamit umanong collateral sa droga ang sanggol saka ipatutubos sa mga magulang.

Todo-tanggi naman si Catolico na sa kanya ang mga hinihinalang droga at iginiit na hindi siya nagtutulak pero, aminadong gumagamit ng droga.

Inamin din nitong nagtu­tungo sa condo ang mga ka­ibigan na kasamang naaresto para gumamit ng droga.

Dati nang nakulong sa droga ang suspek na si Ilah Dalimbang pero, nayaya lang umano na makipag-inuman.

Itinanggi ng mga suspek na tinangay nila ang bata o nagbalak silang ibenta ito. Inihabilin lang umano ito sa isa sa mga suspek na si Villa­rivera. Iti-turnover ng PDEA ang sanggol sa De­partment of Social Welfare and De­velopment.

Makikipag-ugnayan din sila sa NBI at pulisya para masampahan ng kasong human trafficking ang mga suspek.