Hirit ni P-Digong na term-sharing, 'di kinagat sa Kamara
DEDMA pa rin si Rep. Lord Allan Velasco sa 15-21 term-sharing na binasbasan ni Pangulong Rodrigo Duterte.
‘Yan mismo ang utos ni P-Digong sa cabinet meeting noong Lunes ng gabi, Hulyo 1!
◘◘◘
ITINAGUBILIN ni P-Digong ang 15-21 term-sharing kung saan mauupo si Rep. Alan Peter Cayetano bilang Speaker sa unang 15 buwan at papalit si Rep. Velasco sa nalalabing 21 buwan.
Ayon sa ating source, inutusan ni P-Digong ang tatlong cabinet secretaries para magtawag sa mga kongresista para sa pagpapatupad ng 15-21 term-sharing upang matapos na ang gusot sa Kamara!
◘◘◘
BINIGYAN din umano ni P-Digong ng ultimatum si Rep. Velasco dahil itinatatwa nito ang usapang term-sharing kahit kinumpirma na ito ng pangulo.
Sa kabila nito, sinusuway pa rin ni Rep. Velasco si P-Digong!
◘◘◘
IKINAKATWIRAN ni Rep. Velasco na kinukonsulta pa rin niya sina Inday Sara at “Pulong”.
Sa aktuwal, may sariling manok si Mayor Sara na taga-HNP.
Si Cong. “Pulong” naman ay natutukso na rin na maging Speaker.
Naiwan sa pansitan si Rep. Velasco!
◘◘◘
SA ibang ulat, kinumpirma ni PDP-Laban President Koko Pimentel ang term-sharing taliwas sa pagtatwa ni Rep. Velasco.
Pero, nagpasubali si Pimentel na dapat si Rep. Velasco ang unang uupo!
◘◘◘
MARAMI pang maaaring maganap sa girian sa Speakership.
Nag-aabang din ng oportunidad si Rep. Martin Romualdez.
Siyempre, kinakabugan ang kanyang “backer” na si alyas Samuel.
He-he-he!
Comments