BIADO AT DJANGO, SASARGO SA LAS VEGAS 9-BALL OPEN

PANGUNGUNAHAN nina Carlo “The Black Tiger” Biado at Francisco “Django” Bustamante ang pito-kataong pulutong ng mga Pinoy na sasargo sa 2019 Diamond Las Vegas 9-Ball Open sa palaruan ng Rio Al-Suite Hotel and Casino sa Las Vegas, Nevada simula Hulyo 17.

Bagamat sariwa si Biado sa isang runner-up finish katuwang si Jeffrey “The Bull” De Luna sa prestihiyosong World Cup of Pool sa England kamakailan, tiyak na uhaw na uhaw na ito sa pag-akyat muli sa trono ng isang paligsahan. Sa mga de-kalibreng bakbakan na sinalihan niya, pulos segunda rin ang naging ranggo ni Biado. Ito’y ang 2019 World Pool-Billiard Association (WPA) Players Championship at ang pinakahuling World 9-Ball Championship.

Sasargo sa paligsahan ang alamat mula sa Tarlac na si Bustamante na baon ang kumpiyansa na galing sa dalawang One Pocket na korona (Derby City Classic at Big Tyme Classic) ngayong taong ito gayundin sa pagiging overall winner ng 2019 “Junior Norris” Memorial Shoot Out “Chase The Champions” sa Texas. Bukod kina Biado at Bustamante, makikipagsapalaran din sina Raymund “The Pharoah” Faraon, Warren “The Warrior” Kiamco, Johann “Bubwit” Chua, Jeffrey Ignacio at si Rodrigo “Edgie” Geronimo.

Kasama sa mga listahan ng malulupit na balakid sa mga Pinoy patungo sa koronang may kaakibat na $17,000 sina Kuwaiti Omar al-Shaheen, ang tambalan ng World Cup of Pool champion na sina Austrian Albin Ouschan at Mario He, Ralf Souquet at Thorsten Hohmann mula sa Germany, Canadian ace John Morra, Ko Pin-yi at Ko Ping Chung ng Taiwan, Eklent Kaci ng Albania, Dutch Niels Feijen, Dennis Grabe ng Estonia at ang mga Amerikanong sina Shane Van Boening at Skyler Woodward.