Ambisyon nina Cayetano at Velasco na maging Speaker, mauudlot pa sa pag-eksena ni “Pulong” Duterte

PABLO L. HERNANDEZ III / PRANGKAHAN

ALVAREZ, OUT NA SA EKSENA SA PAGKASPEAKER — Mainit ang tunggalian ngayon sa pagkaHouse Speaker sa pagitan nina Taguig City Rep. Alan Peter Cayetano, Marinduque Rep. Lord Allan Velasco at Leyte Rep. Martin Romualdez. Siguro, lulugu-lugo si Davao del Norte Rep. ex-Speaker Pantaleon Alvarez kasi gustung-gusto rin niyang makabalik sa puwesto bilang House Speaker kaya lang, out na siya sa eksena, hu-hu-hu!

◘◘◘

PANGARAP NINA CAYETANO AT VELASCO NA MAGING SPEAKER, BAKA MABULILYASO? — Sabi ni Rep. Cayetano, payag na raw siyang mag-term-sharing sila ni Rep. Velasco sa kondisyong siya (Cayetano) raw dapat ang maunang maging Speaker na tinutulan naman ni Rep. Velasco.Sa buwisit ni Davao City Rep. Paolo “Pulong” Duterte sa mga nagbabangayang kandidato sa pagka-Speaker, nagpasya ang Presidential Son na join na rin daw siya sa labanan sa posisyong Speaker. Kapag itinuloy ni “Pulong” ang sinabi niyang ito, tiyak hindi na magkakaroon ng katuparan ang pangarap nina Rep. Cayetano at Rep. Velasco na maging House Speaker, boom!

◘◘◘

CALIDA, SOLGEN NG PILIPINAS O SOLGEN NG CHINA? — Ipinadi-dismiss ni Solicitor General Jose Calida sa Supreme Court (SC) ang petisyon ng mga mangingisda na pagbawalan ng Philippine gov’t. ang mga Chinese na kumuha ng mga yaman-dagat sa teritoryo ng Pilipinas. Hay naku, ano ba si Calida, SolGen ng Pilipinas o SolGen ng China? Buwisit!

◘◘◘

BAKA MAGBALIK-SELDA SI ERAP — Hindi sinipot ni ex-Manila Mayor Erap Estrada ang pag-turnover ng mga dokumento ng kaban ng bayan kay Mayor Isko Moreno.

Naku, kapag natuklasan ni Mayor Isko na may anomalyang ginawa si ex-Mayor Erap sa kaban ng bayan ng Maynila, malamang, makasuhan ulit ito at maibalik sa selda, saklap!