Hirit ni P-Digong na term-sharing sa kamara, sinopla

PINALABAS umano ni Marinduque Cong. Lord Allan Jay Velasco na sinu­ngaling si Pangulong Rodrigo Duterte nang sabihin nitong walang nabanggit na hatian ng panahon sa puwesto para sa Speakership.

Gayung ang pangulo umano mismo ang kumum­pirma sa kasunduan at nag­sabing sumang-ayon siya sa solusyong ito para matapos na ang hindi pagkakasundo ng dalawang mambabatas.

Kaugnay nito, disma­yado si Taguig-Pateros Cong. Alan Peter Cayetano sa inasta ni Velasco at pinaalala rito na ang pangulo pa mismo ang nagpaliwanag sa mga kung ano ang napag­kasun­duan nila ni Velasco sa pag-upo bilang Speaker ng 18th Congress. “Pinagmumukha ni­yang sinungaling ang ating pangulo. Iniiba niya at pi­nabubulaanan pa ang mga sinabi ni Pangulong Duterte para umayon sa kung ano ang pabor sa kanya,” dag­dag pa ni Cayetano.

Kinumpirma rin ni Pa­ngulong Duterte na puma­yag si Cayetano na umupo sa mas maikling termino na unang 15 buwan bilang Spea­ker at si Velasco sa susunod na 21 buwan.

Gayunman, ayon sa pa­ngulo, last minute nang tila nag-backout si Velasco. “May maayos at sibili­sa­dong paraan para sabi­hing ayaw mo sa isang ka­sun­duan at meron ding ta­mang panahon at ‘yan ay habang magkakaharap kayo kasama ang pangulo. Kung aatras ka at the last minute at pagmumukhain mo pang sinungaling ang pangulo, nagpapakita la­mang ito ng kawalan ng pag­galang sa kanya,” ani Cayetano.