Para sa mas mabilis at ligtas na biyahe LRT, MAY BAGONG SCHEDULE NG OPERASYON

MAGKAKAROON ng bagong schedule ang Light Rail Transit Line 1 (LRT 1) sa huling biyahe ng mga tren simula sa susunod na buwan.

Ayon sa LRT-1, ang bagong iskedyul ng last trip ay epektibo simula sa Hulyo 29. Layon umano nitong bigyang-daan ang system upgrade sa rail line para sa mas mabilis at ligtas na biyahe ng kanilang mga pasahero.

Batay sa advisory ng LRT-1, ang schedule ng huling biyahe ng naturang rail line na mula Baclaran Station ay magiging alas-9:30 na ng gabi mula Lunes hanggang Linggo, maging sa holiday o mas maaga kumpara sa dating alas-10:15 ng gabi mula Lunes hanggang Biyernes at alas-9:45 naman ng gabi kung weekends at holidays.

Samantala, ang last trip naman mula sa Roosevelt Station ay aalis ng alas-9:45 ng gabi mula Lunes hanggang Linggo, maging ng holiday, mula sa dating schedule na alas-10:00 ng gabi, mula Lunes hanggang Biyernes at alas-9:30 naman ng gabi kapag weekends at holidays.

Nabatid na ang unang biyahe o first trips naman mula sa Roosevelt at Baclaran Stations ay mananatiling alas-4:30 ng madaling-araw, mula Lunes hanggang Linggo, maging ng holiday.

Ang LRT-1 ang siyang nagdurugtong sa Roosevelt, at Baclaran Stations, Parañaque City.