22 mangingisdang Pinoy na nabangga ng Chinese vessel sa WPS, ‘wag nang umasa ng hustisya, tsk-tsk-ts
- BULGAR
- Jun 30, 2019
- 2 min read
HUSTISYA, MALABONG MAKAMTAN NG 22 MANGINGISDANG PINOY — Kung pagbabasehan ang statement nina Pangulong Rodrigo Duterte, Senate Pres. Vicente “Tito” Sotto III, House Majority Floorleader Fredenil Castro at DFA Sec. Teodoro “Teddyboy” Locsin, Jr., huwag nang umaasa pa ng hustisya ang 22 mangingisdang Pinoy na muntik nang mamatay sa lunod nang banggain ng Chinese militia vessel ang kanilang bangkang-pangisda sa karagatang sakop ng Pilipinas.
Kada buka kasi ng bunganga ng mga ito, palaging pabor sa China ang kanilang sinasabi sa publiko, hu-hu-hu!
◘◘◘
SABI NI P-DUTERTE, GUGULUHIN NG CHINA ANG PILIPINAS, SABI NAMAN NI PANELO, HINDI! — Ayon kay P-Duterte, ‘pinagbantaan’ daw siya ni Chinese Pres. Xi Jinping na gulo ang aabutin ng Pilipinas mula sa China kapag nagsagawa ng oil exploration sa West Philippine Sea (WPS) ang Duterte gov’t., pero nang tanungin ng media si Presidential Spokesman Salvador Panelo tungkol sa isyung ito, ang sabi niya ay hindi naman daw nagbabanta kundi “friendly advice” lang daw.
Hay naku, palagi namang magkasama sa Malacañang sina P-Duterte at Panelo, pero madalas ang statement nila ay magkasalungat, boom!
◘◘◘
BAKA IPAKULONG NI P-DUTERTE SI REP. TINIO? — Ayon kay ACT Partylist Rep. Antonio Tinio, handa raw nilang tanggapin ang impeachment case na isasampa kay P-Duterte kaugnay sa pagpapahintulot nitong mangisda sa WPS ang mga Chinese.
Naku, malamang, kulong ang aabutin ni Rep. Tinio kasi ang banta ni P-Duterte na ang sinumang magsasampa ng impeachment case laban sa kanya ay kanyang ipakukulong, period!
◘◘◘
RAKET NG MGA SMUGGLING QUEEN, BALIK SA BUREAU OF CUSTOMS — Balik-smuggling operations na naman daw sa Bureau of Customs ang apat na tinaguriang smuggling queens na sina “Tina U”, “Big Mama”, “Kimberly” at “Lea C”.
Kung ganu’n, totoo ang ibinulgar ni Sen. Panfilo “Ping” Lacson na kahit kailan, hindi natitigil ang raket na smuggling sa BOC, buwisit!
Comments