HOME FIBR, NAGPASABOG MARINERA, ‘DI NAKAPORMA

NIRESBAKAN ng PLDT Home Fibr ang Marinerang Pilipina, 25-21, 25-20, 18-25, 25-14, para sa ikalawang diretsong panalo sa Philippine Superliga (PSL) All-Filipino Conference kahapon sa FilOil Flying V Centre sa San Juan City.

Malakas na simula ang ipinamalas ni Gretchel Soltones at naging malakas ang kanyang pagtatapos nang manaig ang Power Hitters at hindi pinagbigyan ang Lady Skippers na manalo sa pres­tihiyosong women’s club tourney.

Bumanat si Soltones, dating San Sebastian College star ng 19 kills at 2 blocks para sa 19-point performance niya sa Power Hitters, na sumalo sa Generika-Ayala para sa ikatlong puwesto ng standings sa 2-1 win-loss slate.

Bukod kay Soltones na mayroon ding 12 digs at 10 excellent receptions, impresibo rin si Aiko Urdas sa 15 points habang si setter Jasmine Nabor ay napakahusay ding laro ang ibinigay upang ganap na makontrol ang tempo sa bisa ng 21 excellent sets. Sa kabila ng panalo, gayunman, hindi pa rin kuntento si PLDT head coach Roger Gorayeb. “It seems that they are out of focus. That’s not the game I wanted to see after months of practice and a year of togetherness,” saad ni Gorayeb. “There’s no steam, we’re lacking of intensity. I’m thankful for the win but they always need a wake-up call before picking up a victory.”

Nawalan ng kontrol ang Power Hitters sa ikatlong set kaya nakalusot ang Lady Skippers at palawigin ang laban. Pero muling naglagablab ang apoy ng PLDT sa 4th set at umabot ng 15-5 start mula sa tirada ni Joyce Sta. Rita bago umariba ng tikas si Soltones at nakapagtarak ng apat na straight points para sa matchpoint, 24-13. Nakapuntos si Judith Abil pero, nasundan ng crucial service error. Nakagawa si Abil ng 11 points, 19 digs at 17 excellent receptions habang si Chiara Permentilla ay may 10 points at 11 digs para sa Marinerang Pilipina na lumasap ng ika-apat na diretsong pagkatalo. (MC/VA)