PATRIOTS, ‘SUGATAN,’ PERO NAGWAGI PA VS. CLASSIC

NAKAHABOL pa ang Parañaque sa halos 20 puntos na pagkaiwan bago nakamit ang come-from-behind 89-83 win laban sa Valenzuela noong Miyerkules ng gabi sa MPBL Season 3 sa Valenzuela Astrodome.

Isang malakas na panalong laro ang ibinigay ni Jemal Vizcarra makaraang hindi makalaro noong nakaraang season. Sa kanyang comeback game, nakapagtarak ang 6-foot-2 ng UST ng 27 puntos at may limang tres puntos.

Dumagdag si Dwight Saguiguit ng 17 puntos upang matulungan si Vizcarra habang ang iba pang batang turko ng Patriots ay may malaki ring kontribusyon sa depensa nang manaig sa Classic.

“Sa totoo lang, ibang klase talaga ‘yung mga batang teammates ko, kasi ‘yung klase ng depensa na ipinakikita nila, hindi ko kaya ‘yun. Kaya kami nakabalik dahil sa kanila,” dagdag ni Vizcarra.

Napigilan ng Patriots ang Classic sa nalalabing 7 minuto. Nanalasa mula 3rd hanggang 4th quarter, nakahabol ang Parañaque mula sa 66-46 na pagkaiwan nang bumasket ng 29-4 at kumpletuhin ang comeback win ng torneo.

Unang nakapagtala ng upset win ang Bicol kontra paboritong Pampanga squad, 82-70. Nagpakawala si dating pro Ronjay Buenafe ng 20 puntos habang si Alwyn Alday ay may binakas na 15 para sa Volcanoes na nakabawi mula sa pagkatalo sa Basilan. Dumagdag si dating PBA player, Alex Nuyles ng 10 puntos.