Paalala sa publiko, huwag magpapabiktima sa mga pekeng bakuna!

RYAN B. SISON / BOSES

KASUNOD ng mga isyung may kina­laman sa gamot, pinag-iingat ng Food and Drug Administration (FDA) ang publiko hinggil sa lumalaganap na pe­keng anti-rabies vaccines.

Sa panahon ngayon, marami pa rin ang nangangailangan nito dahil kung ating ma­papansin, lalong dumarami ang pamilyang nag-aalaga ng aso at pusa sa kanilang taha­nan.

Gayunman, nabahala ang FDA ng ma­diskubre nilang ipinagbibili sa mer­kado ang Anti-Rabies Serum (Equine) 5ml Vial at Purified Rabies Vaccine (Vero Cell) Speeda na peke lang umano kahit may tatak na Equirab at sinertipikahan ng BSV Bioscience Phil., Inc., ang Mar­ke­ting Authorization Hol­der ng pro­dukto.

Samantala, isinapubliko na ng ahen­siya ang batch numbers ng mga pekeng bakuna, gayundin, ang mga palatan­daan sa kahon ng mga ito nang sa gayun ay maagapan ang anumang kapaha­makang maidudulot nito sa publiko.

Kaya ang paalala ng FDA sa mga distri­butor at consumer, bumili lang sa mga ne­gosyanteng may lisensiya mula sa ahensiya at iwasan ang pagtangkilik sa mga pro­duktong mura ngunit, de­likado pala.

Dagdag pa rito, inabisuhan na rin ang Bureau of Customs (BOC) na pigilan ang importasyon ng mga nabanggit na pekeng produkto, isama na rin ang iba pang mga iligal na bagay na hanggang ngayon ay nakalulusot pa rin sa bansa.

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.