Mga babaeng preso, siksikan | BAGONG DORMITORY SA CAMP KARINGAL, INILARGA

INAASAHANG bababa ng 700 percent ang congestion rate ng Quezon City Female Dormitory.

Ito ay makaraang pasinayahan ang bagong four-storey female jailward na ipinagawa ng lokal na pamahalaan na nasa QC Police District Headquarters sa Camp Karingal.

Inilarawan ito ni Mayor Herbert Bautista bilang kontribusyon ng lungsod sa pagpapaunlad ng five pillars ng criminal justice system.

Kabilang din sa sumama sa aktibidad si Bureau of Jail Management and Penology (BJMP) Regional Director J/CSupt. Ignacio Panti.

Sa kasalukuyan, may 1,092 babaeng preso na nakarehistro sa female dormitory ng QC kung saan nasa 1,112 percent ang congestion rate nito. Positibo naman si QC Female Dormitory Jail Superintendent Elena Rocamora na malaking tulong ito para mapalawak ang jail capacity ng naturang dormitoryo.

Matatandaang, inumpisahan ang konstruksiyon ng bagong female jailward noong 2018 kung saan mayroon itong 15 selda na may bunk beds at mattresses.

Mayroon din itong infirmary para sa mga may sakit na inmates at laundry area.

Samantala, gagawin namang development at recreational center para sa mga preso ang lumang female dormitory ng lungsod. (BRT)