Iba’t ibang sintomas ng lumalalang sakit sa puso

SHANE M. LUDOVICE, M.D / SABI NI DOC

Dear Doc. Shane,

Nakararanas ng paninikip ng dibdib ang aking tiyahin at madalas din naming napapansin ang pa­na­namlay niya, pero sa tuwing niyayaya namin siyang magpa-check-up ay tuma­tanggi ito. Ang sabi ng nanay ko ay nasa lahi raw nila ang pagka­ka­roon ng sakit sa puso kaya nababa­hala kami sa kalaga­yan ng aking tiyahin. Maaari ba ninyong talakayin ang mga sintomas ng sakit sa puso? — Grace

Sagot

Ang mataas at patu­loy pang pagtaas ng kaso ng pagkamatay dahil sa sakit sa puso ay maa­aring isisi sa kapaba­yaan sa pangangalaga ng kalusugan at marahil sa mga sintomas na hindi agad nararanasan. Ka­dalasan, ang mga sintomas na hatid ng sakit na ito ay nararam­daman lamang kung kailan malala na ang kondisyon o huli na para magamot ang sakit. Ang malala pa, madalas ay binabalewala ang pagkakaroon ng sakit sa puso sa pag-aakalang ang nararamdamang sintomas ay pangkara­niwan lamang.

Narito ang mga sintomas ng lumala­lang sakit sa puso:

• Pagkahilo at hi­rap sa paghinga — isa sa mga pangunahing sintomas ng sakit sa puso ay ang biglaang pagkahilo at hirap sa paghinga kahit wala namang sakit na hika o problema sa daluyan ng paghinga.

• Paninikip ng dib­dib — isa rin sa pangu­nahing senyales sa pag­ka­karoon ng sakit sa puso ay ang matinding paninikip ng dibdib. Pakiramdam na parang dinadaganan at iniipit ang dibdib at nakasentro sa bandang kaliwa ng dibdib.

• Pananakit sa iba pang bahagi ng kata­wan — ang pananakit na dulot ng sakit sa puso ay hindi lamang nakasen­tro sa dibdib kundi pati na rin sa batok, leeg at mga braso. Madalas ay makararanas din ng pamamanhid at mainit na pakiramdam sa mga bahaging nabanggit.

• Pagkabalisa — ma­dalas ding nakara­ranas ang mga taong may sakit sa puso ng pagkabalisa (anxiety) na sinasabayan ang pagka­hilo at pananakit ng ulo.

• Pananamlay — nagi­ging matamlay ang hitsura ng taong may iniindang sakit sa puso. Kapansin-pansin ang pagiging maputla at parang walang siglang kumilos o magtrabaho.

• Iregular na tibok ng puso — maaaring bumilis nang husto ang tibok ng puso o mas mabagal kaysa sa normal. Ang iregularidad sa ritmo ng tibok ng puso ay isa ring pangunahing senyales ng pagka­karoon ng sakit.

• Panghihina ng katawan — madaling nang­hihina ang katawan at walang enerhiya sa pagkilos ang pagkaka­roon ng sakit sa puso. Sa mga malalalang kon­disyon, nahihirapan nang tumayo, makapag­salita at makaisip dahil sa sakit.

• Pagpapawis — isa pang senyales ng sa­kit ay ang biglaan at hin­di maintindihang pagpa­pawis. Kadalasan, nara­ranasan ito bago ang mismong atake sa puso.