P400-K natangay | SALISI GANG UMATAKE SA OSPITAL

NASA mahigit P400,000 halaga ng assorted items ang natangay mula sa isang mag-asawa matapos sumalakay ang hinihinalang miyembro ng Salisi Gang sa isang ospital sa Muntinlupa City.

Patuloy na nagsasagawa ng follow-up operation para sa ikadarakip ng suspek.

Kinilala ang mga biktima na sina Marlou, 47, at Medelen Deslate, 45.

Base sa inisyal na report na nakarating ng Southern Police District, alas-6:00 ng umaga nang maganap ang insidente sa room 447, 4th floor, Alabang Medical Center sa Alabang-Zapote Road, Bgy. Ayala Alabang, Muntinlupa City.

Dito nadiskubre ng mga biktima na nawawala ang kanilang iba’t ibang kagamitan na nagkakahalagang P413,500. Hinihinalang nabiktima ang mag-asawa ng Salisi Gang.

Agad ipinagbigay-alam ng mga biktima sa mga pulis ang insidente na ngayon ay patuloy pang iniimbestigahan.