Kabayo na naglalakad sa ulap na naging kalabaw
Salaminin natin ang panaginip ni Armeli ng Armeli_Unay@facebook. com
Dear Professor,
Nanaginip ako na marami raw kaming mga tao na nagkakatuwaan, pagkatapos, napatingala ako sa langit at nakita ko ‘yung kabayo na naglalakad sa ulap at habang tinitingnan ko ‘yung ulap ay biglang naging kalabaw at may sakay ito kung saan umakyat papuntang langit.
Ano ang ibig sabihin nito?
Naghihintay,
Armeli
Sa iyo Armeli,
Bilang pagtatapat sa iyo, ngayon ay inaakala mo na hindi na matutupad ang mga pangarap mo. Sa totoo lang, pinanghihinaan ka na ng loob at maririnig sa iyong kalooban na ipinauubaya mo na lang sa langit ang iyong kinabukasan.
Pero, ang sabi ng panaginip, “keep on dreaming”, kumbaga, huwag kang mawalan ng pag-asa, manatili kang nangangarap na ikaw ay magkakaroon ng magandang future.
Ang kabayo ay simbolo ng ambisyon ng tao kaya sabi ng panaginip mo, bakit papatayin mo ang ambisyon mo? Dagdag pa rito, ang taong walang ambisyon ay mananatili sa kahirapan, pero ang may ambisyon ay yayaman.
Ang totoo nga, ang kalabaw sa panaginip mo ay sinisimbolo ng masaganang buhay na ayon sa iyong panaginip ay makaaasa ka na magkakaroon ka ng kasaganahan. Pero, bilang paglilinaw, dapat buhay ang iyong ambisyon.
Kaya sa panaginip, ang kabayo na naging kalabaw ay nagsasabing, ang ambisyon ang magdadala sa iyo ng kasaganahan.
Hanggang sa muli,
Professor Seigusmundo del Mundo
Comments