Tiniyak ng DOH | PEKENG SUKA, SAFE

NILINAW ni Health Secretary Francisco Duque III na ang paglabag sa patakaran hinggil sa “mislabeling” ang isyu sa paggamit ng synthetic acetic acid sa paggawa ng suka at hindi ang safety issue.

Paliwanag ni Duque, walang ‘safety issue’ rito dahil ligtas naman at hindi masama sa kalusugan ang mga ‘synthetic vinegar’ o sukang ginamitan ng ‘synthetic acetic acid’. Gayunman, mahaharap pa rin aniya sa mga konsekuwensiya ang mga kumpanyang gumamit ng synthetic acetic acid sa paggawa ng kanilang produkto.

Ito ay dahil labag aniya ito sa polisiya ng ‘mislabeling’. Paglilinaw pa ni Duque, hindi ito naaayon sa standard na napag-usapan ng industriya at ng regulating agency na Food and Drugs Administration (FDA) na dapat nilang sundin kaya dapat lamang nilang harapin ang konsekuwensiya ng kanilang ginawa.

Matatandaang, ibinunyag ng Philippine Nuclear Research Institute (PNRI) na 15 sa 17 brand ng suka sa bansa ay gumagamit ng synthetic acetic acid.

Sa 39 na brand ng suka na unang sinuri ng FDA ay natuklasang lima ang may synthetic acetic acid.

Ang mga ito ay ang Surebuy Cane Vinegar, Tentay Pinoy Style Vinegar, Tentay Premium Vinegar, Tentay Vinegar Sukang Tunay Asim at Chef’s Flavor Vinegar.

Una na ring nagpalabas ng public advisory ang Department of Trade and Industry (DTI) na pinayuhan ang publiko na iwasan ang pagbili ng mga naturang produkto ng suka.