Dahil sa text message | 4 SANGKOT SA DROGA, TIMBOG

NATIMBOG ang hini­hinalang drug pusher at apat nitong kasama sa ikinasang buy-bust operation sa Valenzuela City.

Unang nakatanggap ng text messages ang Valenzuela City Police mula sa National Capital Region Police Office na ipinadala ng concerned citizen sa hotline number hinggil sa illegal activities ng isang Victor de Jesus, 48, residente ng Bgy. Dalandanan.

Isinailalim ito sa apat na araw na surveillance operation ng mga operatiba ng Valenzuela Police Station Drug Enforcement Unit (SDEU) at nang ma­kum­pirma ang impor­masyon, ikinasa ang buy-bust operation sa pangunguna ni P/Capt. Segundino Bulan, Jr. kontra kay De Jesus sa labas ng kanyang bahay.

Nakaiskor sa suspek ng sachet ng shabu kapalit ng P200 marked money at nang magbi­gay ng go-signal ang pulis na nagkaabutan na, agad lumusob ang back-up na mga operatiba saka si­nung­gaban si De Jesus.

Narekober sa suspek ang buy-bust money, isang pouch na naglala­man ng dalawang sachets ng shabu at P300 cash habang kasama ring nadakip sa operation sina Danilo Aload, Jr., 41; Marlon Gonzales, 49; Argienel Compa­sion, 26, at Rodrigo Si­sing, 50, matapos ma­ku­hanan ng tig-isang sachet ng hinihinalang shabu.

Kaugnay nito, nagpa­hayag naman ng pasasa­lamat si acting Valen­zuela City Police Chief P/Col. Carlito Gaces sa concerned citizen na nagbigay ng tip sa pulisya hinggil sa iligal na aktibidad ng mga suspek.