Budget para sa Marawi victims, ginamit sa pilgrimage | BANTA NI P-DIGONG: COA, ‘PAG PUMALAG, GIYERA!

NAGBANTA si Pangulong Rodrigo Duterte sa Commission on Audit (COA) na huwag gipitin si Task Force Marawi Head Secretary Eduardo del Rosario hinggil sa P5 milyong budget na ginamit sa HAJJ pilgrimage ng mga taga-Marawi sa Mecca.

Ito ang naging babala ng pangulo kasabay ng selebrasyon ng Eid’l Fitr sa Davao City, kamakalawa matapos kuwestiyunin ng COA ang pondo ng Task Force Marawi na ginamit sa pilgrimage sa halip na para sa pagpapatayo ng mga bahay ng mga biktima ng giyera.

Sinabi ng pangulo na magkakaroon ng panibagong giyera kapag ipinakulong si Del Rosario dahil tiyak na maging siya ay makukulong din kasama ang anak na si Mayor Sara Duterte-Carpio.

“So, ngayon, sabihin ko kay COA, huwag mong presuhin ‘yan si Del Rosario kasi kung presuhin mo, pati ako mademanda, pati si Inday. ‘Pag nademanda ang anak ko, pati ako, mapreso ako mag-revolt ulit kami rito sa Mindanao, kayo ang bahala. Then I will start again to gripe against the historical injustice committed against the Moro people,” wika ng pangulo.

Dagdag pa ni Duterte na hindi iligal ang transaksiyon dahil may P15 milyon na annual fund para sa Hajj.

“As a matter of fact, there is a fund set aside to enhance the travel of our brothers and sisters for the pilgrimage to fulfill a lifetime dream,” sabi pa ng Chief Executive.