Milyones sa nalalabing donasyon para sa Marawi victims, talupan!

PABLO L. HERNANDEZ III / PRANGKAHAN

SA P36-M DONASYON, P10-K LANG ANG IBINIGAY NG OCD SA MGA BIKTIMA NG MARAWI WAR — Ibinulgar ng Commission on Audit (COA) na sa P36 milyong donasyon na natanggap ng Office of Civil De­fense (OCD) ay P10,000 lang ang ibinigay nito noong 2018 sa mga bik­tima ng giyera sa Marawi City.

Ganu’n? Eh, ang tanong: Nasaan na ang nalalabi pang P35.99-M cash donation para sa mga biktima ng giyera sa Marawi?

◘◘◘

P-DUTERTE, BIDA SA BALIK-BASURA SA CANADA — Bumiyahe na ang barkong papuntang Canada para ibalik ang mga basurang ipina­dala nila sa Pilipinas.

Kung gumawa lang sana ng aksiyon noon si ex-Pres. Noynoy Aquino tung­kol sa mga basurang ito, sana, siya ang bida sa mata ng publiko pero, dahil nganga lang siya sa isyung ito, ang na­ging bida sa balik-basura sa Canada ay si P-Duterte, palakpakan naman diyan!

◘◘◘

ESTAPADOR AT SWINDLER, STATE-WITNESS NG DUTERTE GOV’T. — Sabi ni DOJ Sec. Menardo Guevarra, gagawin nilang state-wit­ness si Peter Joemel Advincula alyas Bikoy laban sa oposisyon na umano’y nasa likod ng “Oust Duterte Move­ment”.

Tigas din ng ulo ni Sec. Guevarra, kasi si DND Sec. Delfin Lorenzana na ang nagsabing walang “Oust Duterte Movement”, eh, ipinagpipilitan pa rin niyang meron daw kaya gagawing state-witness si ‘Bikoy’.

Hay naku, kapag nangyari iyan, onli in da Pilipins na ang estapador at swindler na tulad ni ‘Bikoy’ ay ginawang state-witness ng gobyerno, boom!

◘◘◘

PDEA, ‘MAGHAHABOL SA TAM­BOL-MAYOR’ KAY JACKY CO — Matapos ibulgar ni Sen. Ping Lacson na nakalabas na ng Pilipinas si Zhijian Xu alyas Jacky Co, ang umano’y Chi­nese drug lord na nagpasok ng tone-toneladang shabu sa bansa, saka lang ito sinampahan ng kasong drug traffic­king ng PDEA.

Dahil diyan, “maghahabol na sa tambol-mayor” ang PDEA kasi kung kailan nakapuga na palabas ng bansa si ‘Jacky Co’, saka lang nila ito sinam­pahan ng kaso, buwisit!