Panawagan sa mga may-ari ng establisimyento, rules and regulations laban sa pambabastos, ipatupad!

RYAN B. SISON / BOSES

PAGSIPOL at pagkindat, dalawa lamang ‘yan sa mga paraan ng pamba­bastos na maaaring gawin ng sinuman para makapang-harass ng kanilang kapwa.

Nakadidismaya dahil kahit alam na ng karamihan na hindi tama ang gani­tong ga­wain ay patuloy pa rin sila sa pag­gawa nito kung saan hindi man lang nila naiisip ang maaaring ma­ramdaman o masamang epekto nito sa tao.

Gayunman, matapos matengga ng isang buwan ay ganap ng batas ang Safe Streets and Public Spaces Act na nag-oobliga sa mga establisimyento na mag­patupad ng kanilang mga patakaran laban sa pambabastos.

Sa ilalim ng batas, maaari na uma­nong maipaaresto sa mga awtoridad ang mga taong bigla na lamang nang-aakbay at kumikin­dat sa mga pampublikong lugar tulad ng kalsada, terminal, resto­ran, eskuwelahan, gayundin sa mga bar, lalo na kung hindi sang-ayon o kom­portable ang taong ginawan nito.

Dagdag pa rito, maging ang mga on­line sexual harassment ay nakapaloob sa nasabing batas.

Samantala, hindi lamang babae ang may karapatang magreklamo ka­ugnay dito dahil sakop nito ang lahat ng kasarian tulad ng lalaki, bakla, tom­boy, lesbian, bisexual at iba pa.

Kaya ang paalala natin sa karamihan bilang respeto sa bawat isa, sundin ang mga pataka­rang makikita natin sa bawat lugar sa bansa, pero kung hindi ninyo mapigilan ang inyong kasamaan, pag­mumulta ng P10, 000 o kulong ang inyong pagpipilian.

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.