P200 milyong cocaine, palutang-lutang sa dagat

UMAABOT sa 40 bloke ng hinihinalang high-grade cocaine na nagkakahalagang mahigit P200 milyon ang nalambat ng mga mangingisda habang palutang-lutang sa karagatang sakop ng Sorsogon.

Batay sa impormasyon, kasalukuyang pumapalaot sa karagatan ang mga mangingisdang sina Melvin Gregorio, Loubert Ergina at John Mark Nabong sa parte ng Bgy. Bagacay sa bayan ng Gubat alas-2:00 ng hapon ng Lunes nang maispatan ang nabanggit na iligal na droga.

Agad nila itong ipinagbigay-alam sa opisyal ng barangay at kalaunan ay sa pulisya.

Tinatayang nasa P218.4 milyon ang kabuuang halaga ng mga nasamsam na cocaine.

Sinasabing posible itong bahagi ng naunang mga cocaine na nadiskubre sa ilang bahagi ng bansa na nagmumula sa Latin America, partikular sa Colombia na nakatakda umanong ipasok sa Australia.

Maaaring sinadyang inihulog sa dagat ang kontrabando para sa iligal na transaksiyon at para hindi agad maitimbre sa mga awtoridad.

Pormal nang nai-turnover ng Sorsogon Provincial Police Office (SPPO) ang nakuhang mga cocaine sa Philippine Drug Enforcement Agency-Bicol Region.