Caregiver, tiklo sa droga

ISANG caregiver na sideline umano ang pagtutulak ng iligal na droga ang arestado matapos magbenta ng shabu sa ikinasang buy-bust operation sa Caloocan City, kahapon ng madaling- araw.

Kinilala ang suspek na si Gina Reyes, 59, biyuda, ng Bgy. 12 ng nasabing lungsod.

Ayon kay PSSg. Rodney dela Rosa, alas-2:00 ng madaling-araw nang ikasa ng mga operatiba ang buy-bust operation kontra sa suspek sa labas ng kanyang bahay.

Nagawang makaiskor ni PCpl. Ronald Robles na nagpanggap na buyer ng isang sachet ng shabu kapalit ng P500 marked money.

Nang tanggapin ng suspek ang pera, agad itong sinunggaban ng operatiba at narekober sa kanya ni PCpl. Michael Castro ang isang sachet ng hinihinalang shabu na nasa P500 ang halaga at buy-bust money.