PMA valedictorian, binigyan ng house and lot ni Digong

NIREGALUHAN kahapon ng house and lot ni Pangulong Rodrigo Duterte si Cadet First Class Dione Mae Umalla na mula sa Ilocos Sur na nagtapos bilang valedictorian ng Philippine Military Academy (PMA) Mabalasik Class of 2019.

Personal na iniabot ng pangulo ang certificate ng house and lot kay Umalla sa graduation rites ng PMA sa Fort Del Pilar sa Baguio City.

Tumanggap din si Umalla ng Presidential Saber at 13 awards.

Nabatid na karaniwan nang nireregulahan ng pangulo ng house and lot ang mga nagtatapos ng valedictorian sa PMA at Philippine National Police Academy (PNPA).

Kabilang pa sa Top 10 graduates ang apat na babaeng kadete na sina Cadets First Class Jahziel Tandoc, Marnel Fundales, Glyn Elinor Marapao at Angelique Pasos.

Kasama rin sina Cadets First Class Jonathan Mendoza, Daniel Heinz Lucas, Aldren Altamero, Richard Lonogan at Daryl James Ligutan.

Nabatid na nasa 261 miyembro ng PMA Mabalasik Class of 2019 ang nagsipagtapos.