Rider pisak sa truck

DEDO ang 24-anyos na merchandizer matapos mabangga ang kanyang minamanehong motorsiklo ng rumaragasang dump truck sa Valenzuela City, kamakalawa ng gabi.

Dead-on-arrival sa Valenzuela Medical Center sanhi ng tinamong mga pinsala sa katawan si John Paul Diolola, ng Bgy. Paso de Blas matapos isugod sa ospital ng rumespondeng mga tauhan ng Valenzuela Rescue Team.

Sa nakarating na ulat kay Valenzuela Police Chief P/Col. David Nicolas Poklay, alas-10:30 ng gabi nang maganap ang insidente sa northbound lane ng MacArthur Highway.

Minamaneho ng biktima ang motorsiklo na may plakang BA 80393 patungo sa Bgy. Karuhatan nang masalpok ito ng rumaragasang dump truck na tinatahak din ang kaparehong direksiyon sa tapat ng Fatima Hospital sa Bgy. Marulas.

Sa lakas ng impact, tumilapon ang biktima mula sa motorsiklo hanggang sa magulungan ang katawan nito ng hulihang gulong ng trak na hindi man lang huminto.

Isang nagmalasakit na motorsita na nakasaksi sa insidente ang nagawang makuha ang temporary license plate ng dump truck na MV File #-1301-0000638786.

Patuloy namang tinutugis ng pulisya upang maaresto ang driver ng dump truck.