Tren ng LRT, nagliyab

NAGKAROON ng tensiyon sa Blumentritt Station ng Light Railways Transit 1 matapos magliyab ang ilalim na bahagi ng tren, kamakalawa ng hapon sa Maynila.

Wala namang nasaktan sa naganap na insidente at hindi nakaapekto sa operasyon ng LRT 1 at agad ding nai-pullout ang tren.

Ayon sa pasahero na si Daniel Nobleza, naghihintay sila ng tren sa Blumentritt Station nang makaamoy sila ng tila nasusunog na wire sa dumarating na tren.

Paghinto umano ng tren ay agad nagliyab ang ilalim na bahagi nito kaya pinalayo ang mga pasahero.

Sinabi naman ni Rochelle Gamboa ng LRT 1, galing sa underbody o sa ilalim ng tren ang usok na napatay naman sa loob lang ng apat na minuto. May 28 tren ng LRT 1 ang bumiyahe kahapon.