PANANAKIT AT PANANAKSAK SA REFEREES KINONDENA NG SBP

KINONDENA ng Samahang Basketbol ng Pilipinas ang ginawang pananaksak sa dalawang basketball referees na inatake ng isang player at supporter sa Tapinac, Olongapo City noong Mayo 18.

Ayon sa statement na ipinalabas ng SBP kahapon, ang bayolenteng pananakit sa game officials ay walang puwang sa basketball at sa anumang sports. “The referees are the unsung heroes of any sport, for without them, no game can be technically conducted and concluded.” Bumiyahe pa si SBP Regional Director for Region III Gil Cortez sa Olongapo City upang alamin ang naturang pangyayari at nagpahatid ng tulong sa mga referees na nasaktan at nakipagpulong din sa mga local authorities upang magkaroon ng hustisya ang sinapit ng game officials.

Ayon sa unang ulat na kumalat sa social media, isang referee ang binugbog at ang isa ay sinaksak sa loob ng court. Sa video ng isang Micah Casejas, ipinakita na ang isa sa referee ay hinahabol sa Tapinac basketball court. Gumigihay na sa pagtakbo ang referee palayo sa attacker niya bago ito bumagsak sa kalye. “We trust that there will be no repetiion of this ugly incident and we call on the basketball community to simply play and support the game according to its merits at all times,” pagtatapos sa statement ng SBP na nilagdaan ni Renauld N. Barros, Executive Director. (MC/VA)