May kasamang 20-anyos | 62-ANYOS NA EMPLEYADO NG CITY HALL PATAY SA MOTEL

TODAS ang 62-anyos na retiradong empleyado ng Manila City Hall matapos atakihin habang nasa motel kasama ang 20-anyos na babae, kamakalawa ng gabi sa Sta. Cruz, Manila.

Hindi na umabot nang buhay sa Jose Reyes Memorial Medical Center (JRMMC) ang biktimang si ‘Wilfredo’, 62, ng Varona St., Tondo, na idineklarang patay alas-8:25 ng gabi.

Batay sa imbestigasyon ni P/ Corporal Rodel Benitez ng Manila Police District-Homicide Section, alas-7:00 ng gabi nang mag-check-in ang biktima sa Century Pension House sa Rizal Avenue, Sta. Cruz at doon umano nakipagkita kay alyas Wanda.

Ayon kay ‘Wanda’, pumunta siya kay ‘Wilfredo’ upang manghiram ng P1,000 para ipambili ng gatas ng kanyang bagong panganak na kambal.

Habang nakaupo umano sa dulo ng kama ang biktima, bigla itong bumagsak at naghabol ng hininga kaya agad nagpasaklolo sa staff ng hotel upang maisugod sa pagamutan ang biktima pero, hindi na rin umabot nang buhay sa ospital.