34 nadale | 2 TREN NG LRT NAGBANGGAAN

SINISIYASAT na ng Light Rail Tran­sit Authority (LRTA) ang salpukan ng da­lawang tren na ikinasugat ng dose-dosenang pasahero, Sabado ng gabi.

Ayon kay Atty. Her­nan­do Cabrera, tagapagsalita ng LRTA, sisiyasatin ng fact-finding committee kung pa­ano gumalaw ang dead train sa riles na naging sanhi ng salpukan.

Maaari aniyang mabuo na ang report tungkol sa im­bestigasyon sa susunod na dalawa hanggang tatlong araw.

Tinatayang 34 na pasa­hero ng LRT 2 ang nasuga­tan sa insidente ngunit, wala na­mang nasa kritikal na kon­disyon. Sinagot na rin ng pangasiwaan ng LRT 2 ang gastusin sa ospital ng mga biktima.

Sa mga sugatan, lima na lamang ang nagpapagaling sa pagamutan hanggang ka­hapon.

Sugatan din ang operator ng tren ngunit, maayos na ang kondisyon nito at nasa kus­todiya na ng LRTA. Si­na­sabing nakatalon ang ope­rator bago pa ang salpukan.

Nangyari ang banggaan malapit sa LRT 2 Anonas Station sa Quezon City, alas-9:15 ng gabi.

Bago ang banggaan, isang tren ng LRT 2 ang nasiraan noong Sabado sa pagitan ng Cubao at Anonas Stations. Ini­lagay ang tren sa emer­gency pocket track para ayusin.

Gayunman, alas-9:15 ng gabi nang kusang umandar ang nasirang tren mula sa emergency pocket track pa­tu­ngong rail track na papun­tang Santolan Station.

Sa mga oras na iyon, may paparating ding tren mula sa Cubao Station. Bagama’t, tu­migil ang paparating na tren matapos maabisuhan sa pa­mamagitan ng radyo, nag­tuluy-tuloy ang pag-andar ng na­sirang tren kaya’t bu­mangga ito.

Natigil ang operasyon ng LRT 2 sa apektadong mga istasyon at bumalik alas-10:47 ng Linggo ng umaga makaraang malinis na ang mga naiwang bakal mula sa banggaan.

Limang tren muna ang pinagana nitong Linggo ngu­nit, inaasahang madaragda­gan na ngayong araw.

Tiniyak naman ng pa­mu­nuan ng LRTA na isolated ang nangyari at nananatiling ligtas na sakyan ang mga tren sa bansa.