Mag-ina nasagasaan sa pedestrian lane

PATAY ang ina habang sugatan ang kanyang anak makaraang masagasaan ng pick-up truck habang nasa pedestrian lane sa Dumaguete, Negros Oriental.

Batay sa report, tanghali nitong Miyerkules nang maganap ang insidente kung saan magkahawak ang hindi na pinangalanang mag-ina habang tumatawid sa pedestrian lane.

Gayunman, sa kalagitnaan ng kanilang paglalakad ay nasagasaan sila ng nasabing pick-up na mabilis na bumabagtas sa patawid na mga biktima.

Nabatid sa pulisya na nagulungan ng sasakyan ang mag-ina at namatay sa ospital ang ina at nasa malubha naman ang kalagayan ng bata.

Napag-alamang nagkaayos na ang pamilya ng mag-ina at ang driver ng sasakyan matapos sagutin ang gastos sa mga biktima.