Pag-report ng manggagawa sa anumang aksidente o panganib habang nasa trabaho

DR. PERSIDA V. RUEDA-ACOSTA / MAGTANONG KAY ATTORNEY

Dear Chief Acosta,

Mahigit sampung taon na akong construction worker sa building site. Noong nakaraang linggo, naaksidente ang isa sa mga katrabaho ko habang nasa pinagtatrabahuhan naming site. Ang ipinagtataka namin ay hindi ito iniulat ng aming officer sa Department of Labor and Employment (DOLE). Isa pa, pinagsabihan din kami ng aming supervisor na huwag daw i-report ang nasabing insidente. Tama ba ito? — Drew

Dear Drew,

Para sa inyong kaalaman, ang inyong katanungan ay tinatalakay sa Section 7 ng Republic Act No. 11058 o An Act Strengthening Compliance with Occupational Safety and Health Standards and Providing Penalties For Violations Thereof. Nabanggit sa probisyon ng batas na:

“Section 7. Workers’ Right to Report Accidents. – Workers and their representatives shall have the right to report accidents, dangerous occurrences, and hazards to the employer, to the DOLE and other concerned government agencies exercising jurisdiction as the competent authority in the specific industry or economic activity.”

Malinaw sa nasabing probisyon ng batas na ang manggagawa o ang kanyang kinatawan ay may karapatang i-report ang mga pangyayaring aksidente o anumang panganib sa kanilang pinagtatrabahuhan sa kanilang employer sa Department of Labor and Employment (DOLE) o sa ibang ahensiya ng gobyerno na may sakop nito. Ang paglabag sa nasabing probisyon ng batas ay maaaring magmulta ng hindi lalagpas ng isandaang libong piso (P100, 000) kada araw alinsunod sa Section 28 ng nabanggit na batas kung saan nakasaad na:

“Section 28. Prohibited Acts. (a) Wilful failure or refusal of an employer, contractor or subcontractor to comply with the required OSH standards or with the required OSH standards or with a compliance order issued by the Secretary of Labor and Employment or by the Secretary’s authorized representative shall make such employer, contractor or subcontractor liable for an administrative fine not exceeding One Hundred Thousand Pesos (P100,000) per day until the violation is corrected, counted from the date the employer or contractor is notified of the violation of the date the compliance order is duly served on the employer. xxx”

Nawa ay nasagot namin ang inyong katanungan. Nais naming ipaalala sa inyo na ang opinyong ito ay nakabase sa inyong mga naisalaysay sa inyong liham at sa pagkakaintindi namin dito. Maaaring maiba ang opinyon kung mayroong karagdagang impormasyong ibibigay. Mas mainam kung personal kayong sasangguni sa abogado.

Maraming salamat sa patuloy ninyong pagtitiwala.