961 VCMs at 1,665 SD cards, palpak | SORRY — COMELEC

SA kabila ng mga nang­yaring kapalpakan sa Vote Counting Machines (VCMs) at problema sa transmission ng election results, ikinokon­sidera pa rin ng Commission on Elections (Comelec) na tagumpay ang ginawang May 13 midterm polls.

Kasabay nito, humingi ng pang-unawa at pasensiya si Comelec Chairman Sheriff Abas sa publiko dahil sa mga nangyaring aberya.

“‘Yun nga lang ang hini­hingi namin ng pang-unawa at pasensiya sa mga tao but sa part namin, sa tingin na­min successful pa rin ang election because ‘yung rate nga masyado pa ring ma­baba para sa amin,” paha­yag ni Abas.

Nasa 1.1% umano o 961 ng 85,769 VCM ang naiulat na depektibo na mataas aniya kumpara sa 801 nag-malfunction na makina na naitala ng poll body noong 2016.

Aabot naman sa 1,665 o 1.9% ng 85,769 SD cards ang nagkaroon ng problema na hindi hamak na mas mataas sa 120 SD defective cards noong 2016 polls.

Batay aniya sa report ng Na­tional Technical Support Center, nasa 1,253 ng mga depektibong SD card ang pi­nalitan habang ang iba ay isinailalim sa reconfigura­tion.