Essential oil may pampatulog, gamit ng kliyente target | MASAHISTANG MAGNANAKAW, KULONG

TIMBOG ang massage therapist na babae na ang modus ay patulugin ang kliyente gamit ang essential oil na hinihinalang may pampatulog bago tangayan ng mahahalagang gamit at pera sa Rizal Park, Manila.

Sinampahan na ng kaso ang suspek na si Evelyn Gabucan Y Zarate, 40, ng Cavite at may address din sa Quezon City.

Nahaharap ang suspek sa mga kasong paglabag sa Article 308 ng Revised Penal Code o Theft, Art. 178 ng RPC o Using Ficti­tious Name and Con­cealing True Name at Art. 172 Section 1 ng RPC o Falsifi­cation of Document.

Alas-3:00 ng madaling-araw nang madakip ang suspek sa Ermita, Manila habang nagmama­neho ng kanyang motorsiklo.

Nakuha sa kanya ang bag na naglalaman ng P10,000, relos at cellphone na uma­no’y ninakaw niya sa kan­yang kliyente/complainant na si Marcos Santos, 33, residente ng Caloocan City.

Alas-2:00 ng madaling-araw nang magising ang bik­tima na wala na ang kanyang sling bag at ang suspek sa Rizal Park, kung saan siya nagpamasahe.

Naglalakad umano ang suspek sa parke nang alukin siya ng suspek ng masahe at nakipagkuwentuhan pa sa kanya hanggang sa naging palagay na ang loob niya.

Ayon sa biktima, P200 lang ang ipinababayad ng suspek kaya pumayag siya at umupo na sa dalang upu­an at sinabihan siya na tanggalin sa katawan ang bag at ilagay sa ilalim ng inuu­puan hanggang sa makatulog dahil mahusay umano ang pagmamasahe at nakaka­antok ang ginamit na essential oil. Nang magising, wala na ang suspek at sling bag ng biktima kaya agad nitong hinanap sa paligid at inire­k­lamo sa MPD-DPIOU.

Nakita naman ang sus­pek kaya nabawi ang bag ng biktima at ang pera ay P2,000 na lang ang nare­kober.

Nalaman na may mga nakahain pang reklamo laban sa suspek na tulad din ng reklamo ng biktima.