Trike sumalpok sa van, 3 patay

TATLO ang nasawi habang nasa walong iba pa ang sugatan nang magkasalpukan ang closed van at tricycle sa Himamaylan, Negros Occidental, Biyernes ng gabi.

Kabilang sa mga nasawi ang driver ng tricycle na si Kevin Jade Montano at mga pasaherong sina Joshua Valdez, 15, at Joy Faith Hontiveros, 9.

Nadala naman sa magkahiwalay na ospital ang anim pang mga pasahero ng tricycle na karamihan ay pawang mga menor-de-edad.

Sugatan din ang driver ng van na si Danny Boy Sanny at pahinante nitong si Roy Daguia.

Nabatid kay Police Lt. Col. Ervin Glenn Provido, nang-agaw umano ng linya ang tricycle habang binabagtas nito ang kahabaan ng national highway at tuluyang nabulaga sa kasalubong na van na nagmula sa pakurbadang daan.

Posible umanong nawalan ng kontrol ang tricycle dahil overloaded ito ng pasahero. Nasa kustodiya ng pulisya ang driver ng van na si Sanny at nahaharap sa kaukulang kaso habang nangako namang tutulong ang may-ari ng van sa pamilya ng mga nasawi at nasugatan.