Enforcer, hinabol ng saksak ng rider

KALABOSO ang isang aircon technician matapos sapakin at habulin ng saksak ang traffic enforcer na nagtangkang humuli sa kanya dahil sa paglabag sa batas-trapiko sa Navotas City, kamakalawa ng hapon.

Kinilala ni Navotas Police Chief P/Col. Rolando Balasabas ang naarestong suspek na si Ferdinand Lauriano, residente ng Bgy. San Jose.

Nagmamando ng trapiko sa kahabaan ng C4 Road, Bgy. Bagumbayan North sina Troy Tuazon, 46, at Philip Salvador, kapwa miyembro ng Navotas City Traffic and Parking Management Office (CTPMO), alas-7:15 ng gabi nang pahintuin nila ang motorsiklong minamaneho ni Lauriano matapos salungatin ang daloy ng trapiko.

Gayunman, tinakbuhan ng suspek ang dalawang traffic enforcers kaya hinabol siya ni Tuazon hanggang sa makorner sa Padilla St.

Nang hingin ni Tuazon ang kanyang lisensiya, sunud-sunod na sapak ang ibinigay ng suspek na nagawa namang mailagan ng biktima.

Bumunot ng balisong si Lauriano saka hinabol ng saksak si Tuazon na mabilis na nakatakbo hanggang sa makahingi ng tulong sa mga nagrorondang barangay tanod sa lugar na nagresulta sa pagkakaaresto sa suspek subalit, hindi nabawi ang patalim.