Habang natutulog | PARKING ATTENDANT BINARIL SA ULO, PATAY

TODAS ang isang parking attendant matapos barilin sa noo habang natutulog sa tabi ng kanyang kinakasama, kahapon ng madaling-araw sa Binondo, Manila.

Kinilala ang biktima na si Bobby Bataller, 39, carwash boy, na nagtatrabaho rin bilang parking attendant at residente ng Parola Compound.

Sa imbestigasyon ng Manila Police District-Homicide Section, alas-5:10 ng madaling-araw nang mangyari ang krimen sa isang barung-barong sa tabi ng pinagtatrabahuhan nitong carwash.

Ayon kay Vangilyn de Jesus, kinakasama ng biktima, naalimpungatan siya nang makarinig ng putok ng baril.

Agad umano niyang binuksan ang ilaw at doon nakitang may tama ng bala ng baril ang biktima kaya agad siyang humingi ng tulong sa mga kapitbahay.

Nabigo naman ang pulisya na makilala ang salarin dahil wala umano silang makitang testigo sa krimen.